獅尾脊

2020年10月, 秋, 乾爽, 幾熱同曬

路線

黃大仙-法藏寺-獅尾脊-三叉徑-大圍

長度: 5.5km

完成時間: 2.5hours

評價

難度類比: 馬尾脊 (牛押山) / 高危 (飛鵝山), 建議先嘗試釣魚翁/大金鐘之類需雙腳輔助路線

主觀難度評分: ★★★

路況: 要雙手輔助 - 少量攀爬, 視乎採用邊個方法過難關 (內文會講)

體能: 路程短, 由法藏寺直上獅子山

正文

獅子山東面有4條路, 難度計: 獅尾脊<=石馬外脊<石馬脊<石馬內脊. 4條路都係由法藏寺起步. 基本上石馬三脊都會接駁獅尾脊後段上山頂.

獅子山經常人頭湧湧, 而獅尾脊算係一條冷門而有少少難度既路線. 相對上少人行但一樣睇到靚景, 又算係更高難度需攀爬既入門階. 交通又方便, 所以個人幾鐘意呢條路線作為短線輕鬆遊.

由黃大仙出發, 又係最辛苦既沙田坳道長命斜

上到法藏寺旁既樓梯開始入山, 上幾級會見到分叉路. 左邊樓梯繼續上, 右邊就石屎平台樹後入山. 兩邊都行過, 網上資料每個人入山方法都唔同, 但相對上右邊更易搵路. 轉入右邊平台會見到入山口有絲帶, 一路上山都可以見到指示 (石上箭咀/絲帶). 迷路風險唔高.

係林入面上升一段, 好快就會景色開揚.

第一舊大石

石上風光

再行一段有一大石係正前方, 就到獅尾脊最難既地方 "天梯石"

石底上望

越過難關方法有三:

1: 橙色路線正攀 (最難)

2: 紫色路線: 先係石底轉右行幾步, 會有少量天然石級再上攀

3: 黃色路線 (最易): 繼續向右走, 會有山徑繞道向上

越過天梯石後已可見獅子山頂, 往後路線都係崎嶇但唔難既山路

已可見九龍全景

繼續行會見到一大舊斷裂既石柱, 名為 "傻人塔"

"傻人塔"既典故可以參考下面網頁

繼續行都係望九龍全景, 差唔多到山頂既時候更可以睇到沙田一帶

見到呢個木塊就已經到達獅子山頂, 人多帶番口罩先

落山可選獅頭或獅尾樓梯下降而麥理浩徑

去大圍可選擇乾隆古道 (最長, 但最靚最好行). 獅紅古道 (最熱門), 三叉徑 (最短但斜).

今次行三叉徑, 比較斜同荒, 但兩旁有粗樹可輔助, 好快就可以落到紅梅谷燒烤場去大圍火車站走人

HK Exotic Hiker