入門行山裝備 (鞋篇)

非廣告, 純粹分享自己揀選裝備既經驗

購買裝備優先順序: 鞋>襪>背囊>其他

行山最重要係鞋. 如果行一般郊遊徑/鋪設好既路, 當時普通波鞋都可以應付. 但點解要買行山鞋?

1. 耐用度: 波鞋主要行/跑一般石屎路舒服/抓地為先, 所以底相對軟身, 而物料多數輕薄透氣為主. 用黎行走山路好快就磨蝕/整污槽波鞋. 反而買一對行山鞋, 可以有幾百公里山路壽命, 唔洗消耗貴價+外型靚既去街鞋

2. 保護性: 行山鞋一般midsole夠厚及硬身, 保護腳掌以免石頭吉腳底. 加上較硬身既整體結構, 防止踩係凹凸不平路面時鞋受壓變形過多, 引致拗柴. 另外鞋頭通常有硬膠toe cap保護腳指避免踢到石腳指受傷.

3. 抓地力: 行山鞋底唔係平既, 而係大量狗牙狀凸出既膠粒, 用黎抓實路面既沙/石增加摩擦力. 唔同鞋廠更加會用唔同outsole膠料, 應用係不同地形. 

而近期比較流行著跑山鞋行山. 一般以言跑山鞋比行山鞋軟身吸震, 物料較輕身舒適, 但相對上耐磨程度低於行山鞋

揀鞋需要考慮既條件

1. Outsole (大底/外底)

選擇狗牙比較深而多方向, 有助抓地.

Decathlon Quechua MH100

外底物料各鞋廠採用不同物料, 而最出名既有Vibram. 部份人話比較防滑.

但要注意係vibram牌子, 有出產唔同配方既膠底, 適合唔同路況. 一般山友講緊防滑既係megagrip, 相對上較軟身, 防滑比起硬身膠底好. Idrogrip就更加係為濕滑路面而設, 但代價係耐用度較低. 而XS Trek係行山boots比較常見, 較硬身耐用, 適合長距離高負重行走. 唔可以只睇有無Vibram logo就斷定防唔防滑. 

一般行山跣唔跣, 除咗外底物料, 更重要係落腳點. 所以不用太過迷信名牌物料 (玩澗/攀石另計)

2. 鞋頭鞋形

相同鞋號但各牌子既鞋頭toe box闊度唔一樣, 亞洲人前掌較闊而歐洲牌子鞋頭偏窄. 小心試鞋. 一般以言, 意大利牌子鞋形較修長鞋頭偏窄, 美國牌子鞋頭會較闊, 日本牌子鞋頭鞋形較闊就接近香港人腳形.

另外最好選擇鞋頭有toe cap保護腳指

3. Upper (鞋身)

鞋身有皮/膠/網面等等, 皮會比較重/硬/焗, 但較耐磨. 需要時間break-in. 網面比較輕身舒適透氣, 接近去街波鞋/跑鞋, 較適合一般行山郊遊.

4. Midsole (中底)

中底厚度/硬度係決定吸震力/穩定性既關鍵. 近年流行較厚底軟身跑山鞋, 加強吸震回彈力, 同時腳踩在路面凹凸不平既感覺降低, 帶黎更舒適感覺. 但代價係因為鞋底厚, 穩定性/路感下降, 行路姿勢需要調節. 而行山鞋底一般較硬身, 加上有shank/rock plate, 增加鞋整體穩定性. 薄厚軟硬鞋底可因應個人喜好而選擇. 一般而言, 行路況較好路線/長途, 軟身中底會比較舒適. 而行路面尖石較多既路線, 較硬身鞋底保護性會比較好.

Hoka Speedgoat

自己同時擁有幾對鞋. 跑山鞋用於較長途而路面狀況較好既路線. 而另一對行山鞋, 用於較崎嶇鞋行路線. 交替穿著.